உயரத்தை அதிகரிக்க உதவும் 10 பயனுள்ள யோகாசனப் பயிற்சிகள்

உயரமும் – யோகாசனமும் – ஒரு அறிமுகம்

உயரம் என்பது  ஒருவரது மரபியலைப் பொறுத்தது என்பது நம்மில் பெரும்பாலோருக்குத் தெரியும்! கட்டுரையின் தலைப்பைப் பார்த்ததும் யோகாசனப் பயிற்சிகள் மூலம் உயரத்தை அதிகரிப்பது என்பது உண்மையில் சாத்தியமா? என்ற கேள்வி உங்கள் மனதில் எழலாம்…

அதற்கான எளிய பதில் ஆம்! யோகாசனம் என்பது உடலின் தோரணையை சீரமைப்பது, முதுகெலும்பு சீரமைப்பு மற்றும் ஒட்டுமொத்த எலும்பு ஆரோக்கியத்திற்கும் பங்களிக்கிறது; ஒருவர் அதிகபட்ச உயரத்தை அடைவதற்கும் யோகாசனம் உதவுகிறது. அது குறித்து மேலும் காண்போம்.

ஒருவரது உயரம் எவ்வாறு தீர்மானிக்கப்படுகிறது?

ஒரு நபரின் உயரம் என்பது முதன்மையாக அவரது மரபியலால் தீர்மானிக்கப்படுகிறது; அவரது பெற்றோரிடமிருந்தும் பெறப்பட்ட பல மரபணுக்களிலிருந்து உயரத்திற்கான காரணிகள் பெறப்படுகின்றன.

இந்த மரபணுக்களே ஒருவரது எலும்பு வளர்ச்சி, எலும்பு அமைப்பு மற்றும் உடல் வளர்ச்சியின் போது நிகழும் ஹார்மோன் கட்டுப்பாடு போன்ற காரணிகளைத் தீர்மானிக்கின்றன.

மரபியல் ஒரு குறிப்பிடத்தக்க காரணியாக இருக்கும் அதே வேளையில் – குழந்தை பருவத்திலும் இளமை பருவத்திலும் உட்கொள்ளும் ஊட்டச்சத்து, உடல் ஆரோக்கியம் மற்றும் ஒட்டுமொத்த வாழ்வியல் போன்ற சுற்றுப்புற காரணிகளும் ஒருவரது உயரத்தை தீர்மானிப்பதில் பங்கு வகிக்கின்றன.

பருவ வயதின் போது நிகழும் ஹார்மோன் மாற்றங்கள் குறிப்பிடத்தக்க உடல் வளர்ச்சியைத் தூண்டுகின்றன; பொதுவாக நீண்ட எலும்புகளில் வளர்ச்சியடையும் பிளேட் எலும்புகள் பிணைக்கப்பட்டவுடன் ஒருவரது வளர்ச்சியும் முடிவடைகிறது.

இப்படி எட்டப்படும் இறுதியான உயரம் மரபணு மாறுபாடுகள் மற்றும் சுற்றுச்சூழல் காரணிகளால் நபருக்கு நபர் வேறுபடலாம்.

யோகாசனப் பயிற்சிகள்

யோகாசனப் பயிற்சிகளின் நோக்கம் – ஒருவரது உடல் தோரணைகள், சுவாசிக்கும் நுட்பங்கள், தியானம் மூலம் மனதை ஒருநிலைப்படுத்துதல் மற்றும் ஒட்டுமொத்த நல்வாழ்வையும் மேம்படுத்துவதாகும்.

பெரும்பாலும் உடலின் நெகிழ்வுத்தன்மை, வலிமை மற்றும் மனத் தெளிவை மேம்படுத்த யோகப் பயிற்சிகளை நாம் மேற்கொள்கிறோம். சில வகையான யோகாசனப் பயிற்சிகள் மறைமுகமாக ஒருவரது உயரத்தை அதிகரிக்க உதவுகிறது.

ஹதா யோகா, யின் யோகா மற்றும் சில இலகுவான முறைகளை உள்ளடக்கிய வின்யாசா பயிற்சிகளின் மூலம் முதுகெலும்பின் நீட்சி, மற்றும் நீளும் தன்மையை மேம்படுத்த இயலும். இதுபோன்ற யோகாசன முறைகளைப் பின்பற்றி, தங்கள் உயரத்தை அதிகரிக்க விரும்பும் நபர்கள், குறிப்பாக வளரிளம் பருவத்தினர் பெரிதும் பயனடையலாம்.

அதேநேரம், வளர்ச்சி முழுமையாக நிறைவடைந்த பெரியவர்களுக்கு, எந்த யோகப் பயிற்சியும் நேரடியாக அவரது உயரத்தை அதிகரிக்க உதவாது என்பதை கவனத்தில் கொள்ள வேண்டும்; ஆனால் வளர்ந்த பெரியவர்களும் அவர்களது ஒட்டுமொத்த உடல் தோரணை மற்றும் உடல் அமைப்பை யோகாசனம் மூலம் மேம்படுத்தலாம்.

அதனால் எலும்புகள் சீரமைவதால் உயரமான தோற்றத்தைப் பெறலாம்.

உயரத்தை அதிகரிக்க 10 யோகாசனங்கள்

1. தடாசனம் (மலை போன்ற போஸ்):

தடாசன யோகப் பயிற்சி ஒருவரது தோரணை மற்றும் முதுகெலும்பு சீரமைப்பை மேம்படுத்த உதவுகிறது; முதுகெலும்பை நீட்டிப்பதன் மூலம் உயரம் அதிகமானது போன்ற தோற்றத்தை உருவாக்க தடாசனம் உதவுகிறது.

தடாசனம் செய்யும் முறை: கால்களை ஒன்றாக வைத்து நேராக நிற்கவும். கைகளை பக்கவாட்டில் தளர்வாக விடவும். பின்னர், கைகளை தலைக்கு மேல் உயர்த்தி, உள்ளங்கைகளை ஒன்றுடன் ஒன்று கும்பிடும் வகையில் ஒட்டிவைத்து பாதம் முதல் விரலின் நுனிகள் வரை உடலை ஸ்ட்ரெட்ச் செய்யவும். தோள்களை தளர்வாக வைத்திருக்வும்.

முழங்கால்கள் ஒன்றுடன் ஒன்று உராயக்கூடாது. தோள்களை இறுக்கமாக வைத்தல் கூடாது.

2. உத்தனாசனம் (முன்னோக்கி வளைதல்):

உத்தனாசன பயிற்சியால் முதுகெலும்பு, தொடை எலும்புகள் மற்றும் கெண்டைக்கால் தசைகள் நீட்சி பெறுகின்றன. இந்த யோகாசனம் முதுகெலும்பின் நெகிழ்வுத்தன்மையையும், நீளமான தோற்றத்தையும் ஊக்குவிக்கிறது.

உத்தனாசனம் செய்யும் முறை: தடாசன யோகப் பயிற்சியின் அடுத்த கட்டமாக இந்த பயிற்சி மேற்கொள்ளப்படுகிறது. தடாசன போஸில் இருந்தவாறே மூச்சை வெளிவிடவும், இடுப்புப் பகுதி மடியுமாறு, கைகளை முன்னோக்கி வைத்து குனியவும், முழங்கால்கள் லேசாக மடங்கினால் தவறில்லை.

கீழே குனிந்து இருப்பதால் உங்கள் மார்புப்பகுதி கால்களுக்கு நேராக  இருக்கும். முதுகெலும்பு நீட்சியடைவதை நீங்கள் உணரலாம். கழுத்தை தளர்த்தி, உங்கள் தலையை கீழ் நோக்கி தொங்க விடுங்கள்.

முடிந்தவரை குனிந்தால் போதுமானது. மல்லுக்கட்டி குனிவதை தவிர்க்கவும். சௌகரியமாக உணரும் வரை மட்டுமே குனிய வேண்டும். கீழ் முதுகில் சிரமத்தை உணர்ந்தால் முழங்கால்களை அதற்கேற்ப மடக்கிக்கொள்ளலாம்.

3. அதோ முக ஸ்வனாசனா (கீழே பார்க்கும் நாய் போஸ்):

அதோ முக ஸ்வனாசனா பயிற்சியில் முதுகெலும்பு, தொடை எலும்புகள் மற்றும் கெண்டைக்கால் பகுதிகள் நீட்சியடைகின்றன. அதே நேரத்தில் கைகள் மற்றும் தோள்களையும் இந்த யோகாசனம் வலுப்படுத்துகிறது. இதனால் உடலின் ஒட்டுமொத்த தோரணை மற்றும் சீரமைப்பு மேம்படுகிறது.

அதோ முக ஸ்வனாசனம் செய்யும் முறை: நேராக நின்றபடி, கீழே குனிந்து, உங்கள் கைகளால் முழங்கால்களைத் தொடவும்.

பின்னர் தரையைத் தொடவும். இடுப்பை மேலே உயர்த்தி, தலைகீழ் V வடிவத்தினை, அதாவது Λ இப்படி இரு கைகள் மற்றும் இரு கால்களையும் தரையில் வைக்கவும். முதுகெலும்பு மேல் நோக்கியும், முகம் பின்புறமாக காணும் வகையிலும் இருக்கும்.

தோள்கள் அல்லது மணிக்கட்டுகளை சிரமப்படுத்துவதைத் தவிர்க்கவும். தொடை எலும்புகள் இறுக்கமாக இருந்தால் முழங்கால்களை லேசாக மடக்கிக் கொள்ளலாம்.

4. பஸ்சிமோட்டனாசனம் (அமர்ந்த நிலையில் முன்னோக்கி குனிதல்):

பஸ்சிமோட்டனாசன பயிற்சியானது முதுகெலும்பு, தொடை எலும்புகள் மற்றும் கெண்டைக்கால் பகுதி உட்பட முழு பின்புற உடலையும் நீளுமாறு செய்கிறது. முதுகெலும்பின் நெகிழ்வுத்தன்மையையும், நீளத்தையும் இந்த பயிற்சி ஊக்குவிக்கிறது.

பஸ்சிமோட்டனாசனம் செய்யும் முறை: கால்களை நீட்டி தரையில் உட்காரவும். மூச்சினை உள்ளிழுத்து, முதுகெலும்பு நீளும் வகையில் நிமிர்ந்து அமரவும்.

பின்னர் மூச்சை வெளியேற்றியபடி இடுப்பினை வளைத்து முன்னோக்கி கீழாக குனியவும். உங்கள் முழங்கால் பகுதிக்கு அருகில் முகம் செல்லுமாறு குனியவும்.

முதுகு கூன் விழுவது போல வளையக் கூடாது. முதுகெலும்பு நேராக இருப்பதை உறுதி செய்யவும். தொடை எலும்புகள் இறுக்கமாக இருந்தால் முழங்கால்களை லேசாக மடக்கிக் கொள்ளலாம்.

5. சேது பந்தாசனம் (பாலம் போன்ற போஸ்):

சேது பந்தாசன பயிற்சி (பிரிட்ஜ் போஸ்) முதுகு தசைகளை பலப்படுத்தி, நெஞ்செலும்பு பகுதியை விரிவடையச் செய்கிறது, முதுகெலும்பை நீளச் செய்கிறது; உடல் தோரணை மற்றும் முதுகெலும்பின் ஆரோக்கியத்திற்கு இந்த பயிற்சி உதவுகிறது.

சேது பந்தாசனம் செய்யும் முறை:  முதுகை கீழே வைத்து மேலே பார்த்தவாறு படுக்கவும். முழங்கால்களை மடக்கி படுத்தவாறே புட்டங்களுக்கு அருகே கொண்டு வரவும்.

பின்பு  கால்களை அழுத்தி, இடுப்பை மேல்நோக்கி உயர்த்தவும். தோள்களும் பாதங்களும்  தரையில் உங்களைத் தாங்கியவாறு இருக்கும்.  சௌகரியமாக இருப்பின், உங்கள் இரண்டு கைகளையும் முதுகின் கீழ் ஒன்றோடொன்று பிடித்துக்கொள்ளவும்.

அழுத்தம் தோளில் தான் இருக்க வேண்டுமே தவிர கழுத்தில் இருக்கக்கூடாது. தாடையை லேசாக குனிந்தவாறு வைக்கவும்.

6. புஜங்காசனம் (பாம்பு ஆசனம்):

கோப்ரா போஸ் எனப்படும் இந்த புஜங்காசன பயிற்சியானது ஒருவரது பின்புற தசைகளை பலப்படுத்துகிறது. நெஞ்சு பகுதியை விரிவடையச் செய்கிறது. முதுகெலும்பை நீளச் செய்கிறது. அதனை நெகிழ்வுத்தன்மை உடையதாக்கி சீரமைக்கிறது.

புஜங்காசனம் செய்யும் முறை: வயிறு கீழாக இருக்குமாறு குப்புறப் படுத்துக்கொள்ளவும். மூச்சை உள்ளிழுத்து, உங்கள் கைகளில் பக்கவாட்டில் கீழே ஊன்றி, உங்கள் மார்பை தரையில் இருந்து மேலே உயர்த்தவும்.

முழங்கைகளை உங்கள் உடலுக்கு நெருக்கமாக வைத்திருங்கள். இந்த பயிற்சி உங்கள் முதுகெலும்பை நீட்சியடையச் செய்து, மார்புப் பகுதியை விரிவடையச் செய்கிறது.

கீழ் முதுகிற்கு அழுத்தம் தருவதைத் தவிர்க்கவும்; முதுகெலும்பை ஆதரிக்க அடிவயிற்றின் தசைகளை பயன்படுத்தவும். தோள்களை தளர்வாகவும், காதுகளிலிருந்து தூரமாகவும் வைக்கவும்.

7. சலபாசனம் (வெட்டுக்கிளி ஆசனம்):

சலபாசன பயிற்சி முதுகு தசைகளை வலுப்படுத்துகிறது மற்றும் முதுகெலும்பை நீட்சியடைய செய்கிறது; ஒட்டுமொத்த முதுகெலும்பு ஆரோக்கியத்தையும் சீரமைக்க இந்த பயிற்சி ஊக்குவிக்கிறது.

சலபாசனம் செய்யும் முறை: இது கோப்ரா போஸின் அடுத்த கட்ட பயிற்சி போன்றது. குப்புறப் படுத்தவாறு மூச்சினை உள்ளிழுத்து – உங்கள் மார்பு, கைகள் மற்றும் கால்களை ஒரே நேரத்தில் தரையில் இருந்து மேல் நோக்கி உயர்த்தவும். உங்கள் கால்கள் மற்றும் கைகளை நேராக வைக்கவும்.

கழுத்திற்கு சிரமம் தரக்கூடாது.  பார்வையை முன்னோக்கி வைத்திருக்க வேண்டும்.

8. தனுராசனம் (வில் ஆசனம்):

இது சற்று கடினமான ஆசனம் தான், எனவே யாரால் முடிகிறதோ அவர்கள் மட்டுமே இதனை செய்ய வேண்டும். இந்த பயிற்சி முன் உடலை நன்றாக நீளச்செயகிறது.

பின்புற தசைகளையும் பலப்படுத்தி முதுகெலும்பின் நெகிழ்வுத்தன்மையையும் சீரமைப்பையும் ஊக்குவிக்கிறது.

தனுராசனம் செய்யும் முறை: கோப்ரா போஸில் உள்ளது போல குப்புறப்படுத்து, உங்கள் முழங்கால்களை வளைத்து, உங்கள் கைகளால் கணுக்கால்களைப் பிடிக்க முயற்சி செய்யவும்.

கால்களை கைகளால் பிடிப்பதால், உங்கள் மார்பு மற்றும் தொடைகள் தரையில் இருந்து மேல்நோக்கி உயர்த்தி, வில் வடிவத்தை பெறுகிறது.

இதற்காக கடினமாக சிரமப்பட வேண்டாம். கால்களை முடிந்தவரை மட்டுமே உயர்த்தவும்.

9. உஸ்த்ராசனா (ஒட்டக ஆசனம்):

ஒட்டக ஆசனம் எனப்படும் உஸ்த்ராசன பயிற்சியானது முன் உடலை நீட்டி, பின்புற தசைகளை பலப்படுத்துகிறது; முதுகெலும்பை சீரமைக்கிறது.

உஸ்த்ராசனம் செய்யும் முறை: முழங்கால்களை இடுப்பு அகலத்திற்கு அப்பால் வைத்து தரையில் மண்டியிடவும். கைகளை மெதுவாக கீழ் முதுகில் வைக்கவும்.

விரல்கள் கீழ் நோக்கி இருத்தல் வேண்டும். மூச்சை உள்ளிழுத்து, மார்பை உயர்த்தி, பின்னால் வளைந்தபடி கைகளை குதிகாலைத் தொட எடுத்துச்செல்லவும். தொடைகளை தரையில் செங்குத்தாக வைக்கவும்.

கீழ் முதுகை வளைக்கக்கூடாது; கழுத்தை தளர்வாக வைக்கவும், கழுத்திற்கு அழுத்தம் தருவதைத் தவிர்க்கவும்.

10. மர்ஜரியாசனம் – பிட்டிலாசனம் (பூனை-மாடு ஆசனம்) :

மர்ஜரியாசனம் – பிட்டிலாசனம் என்கிற இந்த பூனை-மாடு ஆசனமானது முதுகெலும்பிற்கு கதகதப்பினை அளித்து, நெகிழ்வுத்தன்மையை அதிகரித்து முதுகெலும்பை சீரமைக்க  உதவுகிறது.

பூனை-மாடு ஆசனம் செய்யும் முறை: கைகள் மற்றும் முழங்கால்களை தரையில் ஊன்றியபடி இந்த பயிற்சியைத் தொடங்கவும். பின்னர் மூச்சினை உள்ளிழுத்து முதுகை வளைக்கவும்; தலை மற்றும் இடுப்பு எலும்பை  மேலே உயர்த்தவும் (மாடு ஆசனம்).

மூச்சை வெளியே விடவும்; உங்கள் தாடையை கீழாக கழுத்தை நோக்கியும், முதுகெலும்பை மேல் நோக்கியும் வளைவாக உயர்த்தவும். அப்போது தொப்புளை முதுகெலும்பை நோக்கி உள்ளிழுக்கவும் (புனை ஆசனம்). சுவாசத்திற்கு ஏற்றவாறு இந்த  இரண்டு ஆசனங்களையும் மாறிமாறி செய்யவும்.

உங்கள் சுவாசத்துடன் ஒத்திசைந்து மெதுவாகவும், கவனமாகவும் உடல் அசைவுகள் இருத்தல் வேண்டும். முதுகெலும்பை மேலாகவும் சரி, கீழாகவும் சரி அதிகமாக வளைக்கக் கூடாது.

மேற்கூறிய இந்த பத்து ஆசனங்களும் உங்களது உயரத்தை அதிகமாக காட்ட உதவுகின்றன. வளரிளம்பருவத்தினர் இவற்றை செய்யும் போது அவர்களுடைய இயற்கையான உயர வளர்ச்சியை இந்த ஆசனங்கள் ஆதரிக்கும்.

நீங்கள் புதிதாக யோகாசனம் செய்பவராக  இருந்தால், பின்வரும் வழிமுறைகளை நீங்கள் மனதில் கொள்ள வேண்டும்

உங்கள் பயிற்சி முழுவதும் ஆழமாக, நிலையாக சுவாசிப்பதில் கவனம் செலுத்த வேண்டும். சுவாசத்தின் மீது கவனம் செலுத்துவது மனதை அமைதிப்படுத்தவும், உடல் விழிப்புணர்வை அதிகரிக்கவும், உங்கள் யோகப் பயிற்சியை சிறப்பாக செய்யவும் உதவுகிறது.

யோகாசனம் என்பது ஒரு பயிற்சி என்பதை நினைவில் கொள்ளவும். அது எதையும் நிரூபிக்கும் செயல்திறன் வெளிப்பாடு கிடையாது! எனவே படிப்படியாக உங்கள் பயிற்சியை செய்ய வேண்டும்.

அதில் பொறுமை, சாந்தம் மற்றும் ஈடுபாடு அவசியம். உங்கள் முன்னேற்றத்தை மகிழ்ச்சியாக கொண்டாடுங்கள். உங்களுக்குள் புதிதான மாற்றம் நிகழ்வதை நீங்கள் உணரலாம்.

உங்கள் சுவாசத்தை உடலின் இயக்கங்களுடன் ஒருங்கிணைக்கவும். உங்களது உடல் பாகங்கள் நீளும்போது அல்லது விரிவடையும் போது மூச்சை உள்ளிழுக்கவும், அவற்றை மடிக்கும் போது அல்லது சுருக்கும் போது சுவாசத்தை வெளியிடவும்.

ஆழமான, சீரான சுவாசம் மனதை அமைதிப்படுத்தவும், ஒவ்வொரு யோகாசனத்தின் நன்மைகளையும் அதிகரிக்க உதவுகிறது.

ஒவ்வொரு விதமான யோகாசனத்தின் போதும் உங்கள் உடல் எப்படி உணர்கிறது என்பதில் கவனம் செலுத்துங்கள்.

மிகவும் கடினமாக பிரயத்தனம் செய்வதையும், உங்களால் இயன்ற அளவிற்கு அப்பால் உடலைக் கட்டாயப்படுத்தவும் கூடாது. உங்கள் உடலின் தனிப்பட்ட வரம்புகளை மதித்து, அதற்குள் மட்டுமே பயிற்சி செய்ய வேண்டும்.

ஒவ்வொரு யோகாசனத்திற்கும் உரிய முறையான உடலமைப்பு குறித்து கவனமாக இருத்தல் வேண்டும். இல்லையெனில் காயங்கள் ஏற்படலாம். பயிற்சியை சரியாக செய்வதன் மூலமாக மட்டுமே அதிகபட்ச நன்மைகளைப் பெறுவதை உறுதி செய்யலாம்.

யோகாசனப் பயிற்சிக்கு உங்கள் உடலை தயார்படுத்த மென்மையான வார்ம்-அப் பயிற்சிகள் அவசியம்.  முதலில் வார்ம்-அப் செய்யத் தவறாதீர்கள். தசைகள் மற்றும் மூட்டுகளை தளர்த்த எளிய ஸ்ட்ரெட்ச் அல்லது அசைவுகளை மேற்கொள்ளவும்.

உடலுக்குத் தேவையான நீர்ச்சத்தினை வழங்க, பயிற்சிக்கு முன்னும் பின்னும் தேவையான அளவு தண்ணீர் குடிக்கவும். அதுவே ஒட்டுமொத்த ஆரோக்கியத்தை பேணவும், உடலிலிருந்து நச்சுகளை வெளியேற்றவும் உதவுகிறது.

உங்கள் கவனத்தை நீங்கள் செய்யும் பயிற்சியில் வைக்க வேண்டும். கடந்த காலம் அல்லது எதிர்காலத்தைப் பற்றிய கவனச்சிதறல்கள் அல்லது அவ்வாறான எண்ணங்களை விட்டுவிடுங்கள். ஒவ்வொரு யோகப் பயிற்சியின் அனுபவத்திலும், உங்கள் உடலுக்குள் நிகழும் மாற்றங்களின் மீது முழுமையாக மனதை செலுத்தவும்.

எந்த பயிற்சியை செய்தாலும் உடலுக்கு ஓய்வும், மீண்டுவர நேரமும் அவசியம் என்பதை உணரவும். நீங்கள் சோர்வாகவோ அல்லது அளவுக்கு அதிகமாக பயின்றதாக உணர்ந்தால், ஓய்வெடுக்கவும்.  குழந்தை ஆசனம் அல்லது சவாசன (பிண ஆசனம்) நிலையில் ஓய்வு எடுக்கவும்.

யோகப் பயிற்சிகளை ஆதரிக்க தேவையான தரை விரிப்புகள், ஸ்ட்ராப்கள் அல்லது போல்ஸ்டர்கள் போன்ற யோகப் பயிற்சி பொருட்களை தாராளமாக பயன்படுத்தவும்.

உங்கள் உடலின் தேவைகளுக்கு ஏற்ப பல்வேறு யோகப் பயிற்சிகளை  மேற்கொள்ள இந்த பயிற்சி பொருட்கள் உதவும்.

முடிவுரை

யோகாசனங்களை எப்போதும் முழு கவனத்துடன் மனதை ஒருநிலைப்படுத்தி செய்ய வேண்டும். உங்கள் உடலுக்கு எது சாத்தியம் எது சாத்தியமில்லை என்பதை புரிந்துகொண்டு பயிற்சிகளை அணுக வேண்டும்.

உங்களுக்கு  ஏற்கனவே ஏதேனும் மருத்துவ பிரச்சினைகள் அல்லது காயங்கள் இருந்தால், புதிய உடற்பயிற்சி முறையைத் தொடங்குவதற்கு முன் மருத்துவரிடம் ஆலோசனை பெறவேண்டும்.

மேலும், நீங்கள் யோகாசனங்களை புதிதாக செய்பவராக இருந்தால், அல்லது சரியான யோகாசன உடல் தோரணை பற்றி உறுதியாக தெரியவில்லை என்றால் தகுதிவாய்ந்த யோகா பயிற்றுவிப்பாளர் அல்லது குருவிடமிருந்து வழிகாட்டுதலைப் பெற வேண்டும்.

அடிக்கடி கேட்கப்படும் கேள்விகள்